БШК талапкер Рыскелди Момбековду шайлоодон четтеткенин кандай себептери бар?

БШКнын укуктук камсыздоо бөлүмүнүн башчысы Мадина Кутбердиеванын айтымында, Билим берүү министрлиги шайлоо комиссиясынын өтүнүчү менен карап университеттин архивинде 2003-жылы Рыскелди Момбеков   Жусуп Баласагын атындагы Кыргыз улуттук университетин  юридикалык факультетинин бүтүрүүчүсү катары тизмеде жок экенин билдирген.

Бирок саясий уюмдун өкүлдөрү Рыскелди Момбековдун диплому бар же жок экенин сот чечеерин белгилеп, Борбордук шайлоо комиссиясынан анын шайлоого катыша берүүсүн суранышты. БШК мүчөсү Абдыжапар Бекматов белгилегендей, партия өкүлдөрү айткандай, КУУнун диплому жоголсо, талапкер дубликатын таап, тапшыра алат. Муну ал 19-ноябрда болгон жыйында белгилеп өткөн.

«Бирок Билим берүү жана илим министрлиги буга чейин Момбековго мындай номер жана мындай сериядагы диплом берилген эмес деп жооп берди. Бул БШКнын чечим кабыл алуусу үчүн негиз болуп саналат», — деп кошумчалады шайлоо комиссиясынын жетекчиси Нуржан Шайлдабекова.

Эскерте кетсек, буга чейин эле Рыскелди Момбековдун Жусуп Баласагын атындагы КУУнун жасалма диплому бар экени белгилүү болгон. Ал эч качан бул университетте окуган эмес жана мындай номер жана сериядагы диплом бүтүрүүчү Михаил Стародубцевге берилген.

Тергөөнүн версиясы боюнча, Рыскелди Момбеков бул жасалмалыктын негизинде 2011-жылы Дипломатиялык академиянын эл аралык мамилелер факультетинин сырттан окуу бөлүмүнө тапшырып, эки жылдан кийин окууну аяктагандыгы тууралуу жаңы аттестат алган. Бирок Улуттук коопсуздук боюнча мамлекеттик комитеттин маалыматы боюнча, Рыскелди Момбеков башында биринчи жогорку билими болбогондуктан экинчи жогорку билим алууга укугу жок болчу.

Шайлоо 28-ноябрга белгиленген. Жогорку Кеңештин 54 депутаты пропорционалдык система боюнча (саясий партиялардын талапкерлеринин ачык тизмелери боюнча) бирдиктүү шайлоо округу менен, 36 депутат бир мандаттуу округдар боюнча мажоритардык система менен шайланат.