Жаңы паспорт 2021-жылдын апрель айынан баштап берилет (сүрөт)

Жаңы жалпы жарандык биометрикалык-электрондук паспорттор 2021-жылдын 1-апрелинен тарта берилип баштайт. Бул тууралуу Мамлекеттик каттоо кызматынын төрагасынын орун басары Тилек Батырканов Бишкекте өткөн маалымат жыйында билдирди.

Анын айтымында, жаңы паспорттордо коопсуздук тутуму өркүндөтүлгөн.

«2015-жылы өкмөт биометрикалык-электрондук паспортторду киргизүү боюнча чечим кабыл алган. 2016-жылы долбоор Мекемелер аралык комиссия тарабынан жактырылган. 2018-жылы бланктарды сатып алуу боюнча тендер өткөрүлдү. Соттук териштирүүлөрдөн улам, бул кечеңдетилген. 2019-жылы Жогорку Сот өткөрүлгөн тендерлерди белгиледи», — деди ал.

2020-жылдын март айында Мекемелер аралык комиссия түзүлүп, тендердин жыйынтыгында германиялык компания утуп алган. 2020-жылы май айында келишим түзүлгөн.

«Пандемия болгондуктан, жумуш онлайн режиминде жүргүзүлдү. Сентябрь айында долбоордун үлгүлөрүн таштап, бекиткенге жетиштик. Сигналдын бланктары алынды», — деди ал.

Ошондой эле жалпы жарандык паспортту алуунун жалпы наркы миң сомго барышы мүмкүн. Жаңы паспорттун жасалуу наркы 402 сомду түзгөн 34 беттик жана 470 сомду түзгөн 50 беттик 2 варианты бар.

Бул паспорт — заманбап талапка ылайык өркүндөтүлгөн паспорттордун бири. Электрондук паспорттордун башкы артыкчылыгы — 30дан ашык заманбап коопсуздук элементтеринин колдонушу, жана паспорттун мукабасында электрондук чиптин болуусу. Материалды жасоодо жана жеке маалыматтарды түшүрүүдө лазердик технологиялар колдонулган.