Жогорку Кеңештин төрагасынын кеңешчиси депутат болду

Борбордук шайлоо комиссиясы бүгүнкү жыйынында Максат Алымбековду Жогорку Кеңештин депутаты кылып каттады. Ал Чүйдүн Аламүдүн районудагы №20 шайлоо округунан шайланып, кийин мандатын тапшырган Темирлан Айтиевдин ордуна келет.

2025-жылы ноябрда өткөн Жогорку Кеңештин депутаттарын мөөнөтүнөн мурда шайлоодо аталган округдан 9 021 добуш менен биринчи болуп келген 26 жаштагы Айтиев 12-майда өз каалоосу менен мандатын тапшырган. Анын алдында атасы Тынычбек Айтиев шылуундукка айыпталып кармалганы кабарланган болчу. Депутат мандатын тапшыргандын эртеси атасы 15-июнга чейин үй камагына чыгарылган.

42 жаштагы Алымбеков 2 867 добуш менен үчүнчү сапты ээлеген. Ал Ысык-Көлдүн Балыкчы шаарында туулган. 2017-2021-жылдары Бишкек шаардык кеңешинин аппаратынын жетекчиси болгон. 2021-жылдан тартып Бишкек шаардык кеңешинин депутаты, «Ынтымак» фракциясынын лидери.

Ошол эле учурда Жогорку Кеңештин төрагасы Марлен Маматалиевдин коомдук кеңешчиси кызматын аткарып келген.